Turmush — Кара-Буура районунун Сатыкей айылынын 28 жаштагы тургуну Аманбай Сайрамбаев 5 жылдан бери күлүктөрдү багып келет. Аймактык кабарчы аны менен таанышты.
Өзүнүн айтымында, бала кезинен мал карап чоңойгон.
«Өзүм 7-классты бүтүп, Бишкек шаарына кеткем. Бирок үйдүн кенже баласы болгондуктан 2017-жылы айылга келгем, ата-энени карап жашаш керек дегендей. Айылда көпчүлүк эле тургундар мал жана дыйкан чарбачылык менен алек болушат эмеспи. Мен дагы эл катары катардагы эле мал кармачумун.
Айылда Рамил деген эң жакын досум бар. Саяпкер бала, көп жылдан бери ат чаап келет. Ошолор ат чапканын көрүп, менде да кызыгуу пайда болду. Мен дагы күлүк ат алып чапсам деп кыялданчумун. Көп өтпөй кыялымды орундатуу максатында жөнөкөй бээлеримди сатып, таза кандуу, англис породасындагы бээлерди алайын деп чечтим. Досум менен Бишкекке барып, көп жерден аттарды, бээлерди көрдүк. Чүй өрөөнүндөгү Каракетов жылкы заводуна барып, 2 бээ сатып алдым. Бири азыркы учурда жарыштарга чыгып жүргөн мыкты кунанымдын энеси Барби деген жылкы болчу. Ал убакта Барбинин курсагында келип, бул жактан туулган. Бээни 2019-жылы 300 миң сомго сатып алгам.
Барбиден азыркы кунаным Резвая туулган. Атасы Ретриод деген айгыр. Резвая туулгандан кийин апасы Барбини өзүбүздүн айылыбызда Рыспай деген акебиздин немец айгырына коюп, 2021-жылы дагы бир кулун туулду. Аны дагы витаминдеп багып, өзүбүз чабабыз деп жүрсөк таза кандуу жылкыларды багып жүргөн тайкем «мага сат» деп 250 миң сомго сатып алып кеткен. Андан кийин ошол айгырга койгом. 2022-жылы март айында дагы бир кулун туулган. Аны дагы өзүм чабам деп багып жаткам. Бирок мамилебиз жакшы болуп жүргөн Алмаз деген агам «мага сат» деп 300 миң сомго сатып алган болчу. Азыр кайтадан ошол айгырдан бооз.
2020-жылы Резваяны байгеге кошуп баштадым. Тайында кайсы байгеге кошсок бирин да калтырбай Талас ичинен утуп жатты. Жакшы жыйынтык көрсөтүп, байгелергее ээ болуп жаткандыктан 2021-жылдын жыйынтыгы боюнча Талас ичинен «Мыкты тай» наамын беришкен. 2022-жылы тайыбыз кунан болуп, февраль айынан баштап иштетип баштадык. Нооруз майрамында уюштурулган байгеден 1-орунга ээ болду. 9-майда өткөн республикалык байгеде 3-орунга ээ болду. Курман айттагы ат чабышта республика боюнча 1-орунга ээ болгон. Андан кийин күзгү чабышка деп атайын эс алдырттык. Күзүндө аш-тойлор көп болот эмеспи, ьиринде ашка барып 2-орун, тойго барып аламан чабышка кошуп чаптырып 1-орунду ээледик. Ошол менен жылды жыйынтыгын жаптык. 2022-жылдын жыйынтыгы боюнча Талас ичинен «Мыкты кунан» деп табылып жеңишке жеттик», - деди ал.
Аманбай Сайрамбаевдин аргымактарын Жыргалбек Балыбаев таптайт. Мыкты кунанды дал ушул саяпкер таптап, байгелерге даярдайт.
«Кыш мезгилинде эртең менен саат 8:00до турам. Кышында кышкы жумуш деп коёт. Эртең менен малдарды жайгарып, аттарды жайгарып чөп, жемдерин берем. Түштө суугаргандан кийин минип кетем. 2 сааттай атты бастырып, машыктырып, акырындап чаап келем. Келген соң 2 саттай байлап коём. Байлангандан кийин чөпкө коё берем. Кечки саат 18:00гө чейин чөптө турат. 18:00дөн кийин суугарып, жемин салып, коё берип коём.
Ал эми жайкы мезгилде жайкы жумуш деп койот. Анда сөзсүз эртең эрте туруп, атты минип, 1 саттай бастырып келем. Кайра саат 14:00, 15:00дө машыгууга чыгарам. Келип 2 саат байланат. Кечинде суугарып туруп жем, чөбүн беребиз. Атка атайын витаминдерин беребиз. Алма, сабиздер да маал-маалы менен берилип турат. Булар деле жаш балдардай. Күн сайын маанайларына карап машыгуу жүргүзөм. Эгер маанайы жок болсо жөн гана бастырып коём. Ал эми маанайы бар болгон учурда машыгуу улантылат», - деди ал.
Аманбай Сайрамбаевдин байланыш номурун биздин сайтка катталуу менен биле аласыз.
