Turmush — Бакыт Кыдыралиев жетектеген Талас районунун Бекмолдо айыл аймагында 6397 адам жашайт. Аймактык кабарчы айыл аймактан кабар алды.
Маалым болгондой, аталган айыл жергиликтүү бюджети менен Кыргызстандагы эң бай айыл өкмөттөрдүн катарында турат. Бекмолдо айыл аймагында 2023-жылы бир катар ири долбоорлор ишке ашууда. Калкты таза суу менен камсыз кылуу долбоору Бекмолдо айыл аймагынын 3 айылына тең каралып, Сасык-Булак айылына таза суу долбооруна жергиликтүү бюджеттин эсебинен 67 млн 116 миң 225 сом бөлүнгөн. Азыркы учурда иш кызуу журуп аткарылган иштер ортолоп калды.
- Бакыт Кыдыралиев Бекмолдо айыл аймагынын башчысы болуп 2023-жылдын сентябрь айында дайындалган. Кесиби боюнча саясат таануучу. Буга чейин жеке компанияда аткаруучу директор болуп иштеп, жооптуу кызматтарды аркалаган.
Бакыт Кыдыралиев
Эмгек жолу:
- 2022-2023-жылдары «Ай Ти-Клаб» ЖЧКсынын аткаруучу директору;
- 2020-2021-жылдары Кыргыз Республикасынын Билим берүү жана илим министрлигине караштуу Баштапкы кесиптик билим берүү агенттигинин директорунун орун басары;
- 2016-2020-жылдары №47 кесиптик лицейдин директору;
- 2013-2015-жылдары КТРКнын башкы директорунун орун басарынын жардамчысы;
- 2012-2015-жылдары Бишкек шаардык кеңешинин депутатынын жардамчысы;
- 2009-2013-жылдары «Неастор Лимитед» ЖЧКсында иштеген;
- 2003-2005-жылдары «Три-М» ЖЧКсы, кызматы: Коомчулук менен байланыштар боюнча менеджер.
Кеңеш айылында таза суу долбоору ишке ашып, 38 млн 180 миң 105 сом бөлүнгөн. Чоң-Токой айылында дагы таза суу долбоору ишке ашырылып, ал үчүн 37 млн 174 миң 731 сом бөлүнгөн.
Айылдын билим берүү базасын жакшыртуу максатында Сасык-Булак айылындагы Жумагул уулу Алымкул атындагы мектепте толук капиталдык оңдоо иштери бүтүү алдында турат. Аталган жумуштарга жергиликтүү бюджеттен 13 млн 238 миң сом бөлүнгөн. Иштер 15-январда аяктайт.
Сасык-Булак айылында 30 жылдан бери биринчи жолу 120 орундуу бала бакчанын курулушу башталып, ага жергиликтүү бюджеттен 72 млн сом каралган. Б.Чойбеков атындагы эскилиги жеткен музейди толук капиталдык оңдоодон өткөрүү үчүн 6,5 млн сом бөлүнүп, жакын арада аяктоо алдында турат. Айылдын көчөлөрүнө декаративдик жасалгалоо долбооруна 4 млн 545 миң 600 сом каралган.
Кара-Ой айылында 2021-жылы спорт комплекс курулуп, бирок толук бүтпөй калган. Аны быйыл тез аранын ичинде бүтүрүү үчүн жергиликтүү бюджеттен 11 млн 504 миң 270 сом бөлүнүп, иштер аяктоо алдында турат.
Кара-Ой Сасык-Булак, Кеңеш жана Чон-Токой айылдарына мал дарылоо жана камоого атайын жай салуу демилгеси көтөрүлүп, азыркы учурда Кеңеш айылында мал камоочу жай толугу менен бүтүп, ишке берилди. Калган 3 айылда иш башталып Сасык-Булак айылына кой мончосун салуу пландалууда.
26-декабрь күнү Кыргызстанда биринчилерден болуп Талас районунун Бекмолдо айыл аймагынын бардык айылдарына интернет тартылып баштады. Алгач эле Кеңеш айылына «Кыргызтелеком» мамлекеттик ишканасы менен бирдикте ар бир үйгө интернет киргизүү иштери башталды. Бекмолдо айыл өкмөтүнүн башчысы Бакыт Кыдыралиевдин, жергиликтүү депутаттарынын жана тургундардын катышуусунда анын ачылышы болуп өттү. Буга чейин интернет зымдары тартылган. Азыр 20дай үйгө интернет кирди. Буйруса 1 ай ичинде толук айылга киргизилет. Буга жалпы сарпталган каражаттын жарымын айыл өкмөт, ал эми жарым сумманы «Кыргызтелеком» ишканасы төлөйт. Ал үчүн атайын келишим түзүлүп, долбоор ишке ашып жатат.
Учурда ушундай ири долбоорлор ишке ашып, бул иштерди аткарып жаткан айыл өкмөт башчысы Бакыт Кыдыралиевге айыл эли ыраазы болушуп, батасын берип турган чак.