Turmush — Талас районунун Кырк-Казык айылынын 17 жаштагы тургуну Камила Исакова кичинекей кезинен ырдап, сахнага чыгып келет. Аймактык кабарчы андан кабар алды.
Анын айтымында, азыркы учурда 11-класста билим алып жатат.
«Мектепти аяктагандан кийин чыгармачылыкка дагы да терең кирип, музыкалык окуу жайга тапшырууну каалап жатам. Ырчылык өнөр мага ата-энемден келген деп ойлойм. Атам кыяк чертип, ырдайт. Апам болсо музыкалык жогорку билимге ээ. Көп жылдан бери мектепте жана бала бакчада музыка сабагынан мугалим боулп келе жатат. А
Азырынча музыкалык аспаптарда ойной элекмин. Бирок бул багытка кызыгам. Келечекте сөзсүз үйрөнөм деген максатым бар. Кичинекей кезимден бери ырдаганга кызыгып, өз каалоом менен ырдап келем. Бул жолдо апам дайыма жанымда болуп, мени колдоп келет. Сахнага чыгышыма да апамдын салымы чоң.
Сахнага чыккан сайын ар кандай сезимдер болот. Элдин алдына чыгып ырдаганда толкундануу, кубаныч, жоопкерчилик баары аралашат. Сахнадан такыр эле коркпойм. Кичинекей кезимден чыгып калгангабы, өзүмдү эркин сезем. Ошол эле учурда башка ырчылар менен таанышып, алардын кеңештерин угуу да мага чоң тажрыйба берет. Элдин колдоосу, жакшы сөздөрү — эң чоң мотивация.
Ар бир кароо сынактарга, концерттерге же тойлорго чыгар алдында сөзсүз даярданам. Өзүмдү бардык жактан даярдап, сахнага ишеним менен чыгууга аракет кылам.
Мен үй-бүлөдө 6 бир туугандын эң кичүүсүмүн. Бир байкем жана эжелерим бар. Алар да дайыма мени колдоп, дем берип турушат», - деди ал.