Turmush — Таластын Козучак айылы «Беш-Таш» жаратылыш сейил багынын кире беришинде жайгашып, ажайып кооздугу менен таанымал. Turmush басылмасынын аймактык кабарчысына жергиликтүү тургундардан элеттин таржымалын тактады.
Алардын айтымында, айылдын Козучак деп аталып калышы дагы жөн жерден эмес. Айыл тургундарынын кээ бирлери Козучак деп аталып калышы кайсы бир инсандын ысымы менен байланыштуу дешсе, айрымдары Беш-Таш капчыгайынын ичиндеги Козучак кыштоосунун атынан улам аталып калган деп белгилешет.
Бирок айылдын аксакалы Кушчугул Жапаров айылдын аталышы тууралуу жогорудагы ой-пикирлерди четке кагат. Ал азыркы айыл жайгашкан жер учурунда козу кайтарууга өтө ыңгайлуу жер болгонун белгилейт.
«Малчылар койлорун козулардан бөлүп, жайлоого алып чыкканда бул аймакка жайышкан. Айылдын орду козу жайганга ыңгайлуу жер болгондуктан айыл аксакалдары башка айылдарга барып калган учурда өздөрүн козу жайылып жүргөн жерден келдик деп тааныштырышкан. Андан улам Козучак айылы деп аталып калган экен», - деди айыл аксакалы.
Бир учурда козу жайганга өтө ыңгайлуу жай катары колдонулуп келген аймакка айыл пайда болуп, көчөлөр түшкөн. Айылдагы 233 түтүндө 1747 адам жашайт. Козучак айылы деңиз деңгээлинен 1100-1200 метр бийиктикте, облустун борборунан 10 чакырым алыстыкта жайгашкан.